Kolmunninn farinn yfir í írska lögsögu

Skip Síldarvinnslunnar eru nú hætt kolmunnaveiðum að sinni. Komu þau til löndunar um helgina, þar sem Börkur NK landaði 1.830 tonnum í Neskaupstað og Beitir NK 1.320 tonnum á Seyðisfirði.

Margrét EA er þá að landa 800 tonnum á Neskaupstað og verið er að taka við 1.250 tonnum úr Bjarna Ólafssyni AK á Seyðisfirði.

Þetta kemur fram í tilkynningu frá Síldarvinnslunni. Segir þar að veiðisvæði skipanna hafi verið vestur af Írlandi, í um það bil 650 mílna fjarlægð frá austfirskum höfnum.

„Í fyrstu gengu veiðarnar sæmilega og landaði Vilhelm Þorsteinsson EA 1.760 tonnum í Neskaupstað sl. þriðjudag. Seinni hluta síðustu viku dró mikið úr veiðinni og var kolmunninn þá að ganga inn í írska lögsögu þar sem íslensku skipin hafa ekki heimild til veiða.“

Hlé verður því gert á veiðunum og þess beðið að fiskurinn gangi inn í færeyska lögsögu. Er það sagt geta gerst snemma í næsta mánuði, miðað við reynslu fyrri ára.

• Blogga um frétt