Fínt að vera í Fuglafirði
Sigurður Bogi Sævarsson
Setja bókamerki
„Hér í Færeyjum væsir ekki um okkur,“ segir Guðmundur Huginn Guðmundsson skipstjóri á Huginn VE. Skipið hefur legið inni í Fuglafirði í Austurey í Færeyjum síðasta sólarhringinn meðan beðið er varahluta í togbúnað skipsins. Sú sending kom frá Noregi nú síðdegis og ætti skipið því að geta haldið á kolmunnamiðin í kvöld. Í landlegunni hefur þó ekki væst um Eyjapeyjana, sem blaðamaður mbl.is í Fuglafirði hitti nú síðdegis.
„Komdu um borð, það er alltaf gaman að hitta Íslendinga í erlendri höfn. Já, þú mátt trúa mér að það er fínt að vera í Fuglafirði,“ sagði Guðmundur Huginn. Hann lagði í haf frá Vestmannaeyjum á þriðjudag, en siglingin þaðan til Færeyja tekur um sólarhring. Kolmunnamiðin eru um 80-100 sjómílur suður af Færeyjum, þar sem heitir Miðlína.
Skipin eru sautján
Íslensku kolmunnaskipin eru alls 17 og samkvæmt samningum sem veiðarnar stjórnast af mega 12 skip vera inni á miðunum á hverjum tíma. Fimm skip geta því því þurft að bíða undan línunnar, jafnvel í nokkra sólarhringa. Þegar eitt skip fer út má annað koma inn.
„Slíkt getur skapað talsverða pressu meðal manna þótt allt sleppi til,“ segir Guðmundur Huginn. Hann væntir þess þó að komast fljótt í veiði nú þegar hann tekur stímið frá Fuglafirði. Það mun svo ráðast af aðstæðum hvar aflanum verður landað, það er heima á Íslandi eða þá í Fuglafirði eins og oft hefur gerst á fyrri árum.
Guðmundur Huginn gerir ráð fyrir því að kolmunnavertíðin standi í einn mánuð. „Við getum náð þetta 1.800 til 1.900 tonnum af afla í hvejum túr. Erum þó aðeins hálfdrættingar á við stærstu skipin sem ná kannski 3.000 tonnum.“
Spenntur að komast úr höfn
Tíu manns eru í áhöfn Hugins. Nokkrir af þeim brugðu undir sig betri fætinum í gærkvöldi og fóru að skemmta sér í Þórshöfn. Síðdegis í dag fylgdust menn svo í gegnum netið með úrslitaleik í handboltanum – þar sem Valur vann nauman sigur á ÍBV. Stemningin í borðstofunni var góð, bæði var leikurinn spennandi og svo flugu allskonar sögur og brandarar milli manna.
„Það var tölvubúnaður í spilinu sem klikkaði. Við höfðum því ekki um annað að velja en koma hér inn meðan varahlutum væri reddað. Og nú sýnist mér sendiferðabíllinn vera að renna í hlað og þá eru græjurnar komnar. Þetta er allt að smella og viðgerð tekur ekki langan tíma,“ sagði skipstjórinn – spenntur fyrir því að komast úr höfn.
Telur forsendur fyrir vaxtalækkun
„Hvílir mikil leynd yfir þessu öllu“
Eyjafjarðarbraut lokað vegna alvarlegs umferðarslyss
„Umsátursástand“
Væri að ljúga ef ég segðist ekki stressaður
„Það þarf að vinna mikinn fjölda upp“
Banna mengandi búnað sem leyfður er á Íslandi
Gígbarmurinn hækkað frá því í gær