Hafró fær styrki fyrir 61 milljón króna

87 milljónum króna var nýlega úthlutað úr Umhverfissjóði sjókvíaeldis. Hafrannsóknastofnun fékk styrki að fjárhæð samtals 61 milljón. Meginmarkmið með styrkjum úr sjóðnum er að lágmarka umhverfisáhrif af völdum sjókvíaeldis. 

Úthlutað var 10 styrkjum að þessu sinni.

Hæsta styrkinn, 25 milljónir króna, fékk Hafrannsóknastofnun í verkefnið mat á burðarþoli fjarða og sjókvíaeldissvæða.

Hafrannsóknastofnun fékk einnig næsthæsta og þriðja hæsta styrkinn. Annars vegar 22 milljónir í verkefni um vöktun á umhverfisáhrifum sjókvíaeldis og hins vegar tæpar 14 milljónir vegna verkefnis um áhættu erfðablöndunar á villta stofna.

Þá var 6 milljónum úthlutað til verkefnis um erfðafræðileg áhrif laxeldis á villta laxastofna sem Matís og Hafrannsóknastofnun standa að.

Verkefni Tilraunastöðvar Háskóla Íslands að Keldum um rannsóknir á veirusýkingum í hrognkelsum fékk styrk að fjárhæð 5 milljónir króna.