Spurði um heilindi stjórnarþingmanna

Logi Einarsson, þingmaður og formaður Samfylkingarinnar, spurði Benedikt Jóhannesson, fjármála- og efnahagsráðherra, að því á Alþingi í dag hvort hann teldi stjórnarflokkana ganga heila til nefndarstarfa um framtíðarfyrirkomulag sjávarútvegsmála.

Tilefnið er ummæli þingmanna Sjálfstæðisflokksins sem birtust í Morgunblaðinu á laugardag.

„Ef þessi svokalla þverpólitíska nefnd skilar frumvarpi sem felur í sér byltingarkenndar breytingartillögur, sem grafa undan góðu sjávarútvegskerfi okkar, þá verður það frumvarp einfaldlega stöðvað á Alþingi, og þar munu Sjálfstæðisflokkur og örugglega Framsóknarflokkur og fleiri ná saman. Við látum ekki eyðileggja gott kerfi, þótt við séum vissulega opnir fyrir einhverjum breytingum, svo sem á reglum um framsal og veiðiskyldu,“ var haft eftir einum þingmanna flokksins í Morgunblaðinu og eftir öðrum:

„Menn eru ekkert að stressa sig á þessu, því komi nefndin með tillögur um grundvallarbreytingar, þá verða þær einfaldlega stöðvaðar í þinginu. Þetta er nú ekki ýkja flókið.“

Logi, sem situr í fyrrnefndri þverpólítísku nefnd, spurði ráðherra hvort honum þættu ummælin ekki óþægileg og hvort stóryrði stjórnarþingmanna í fjölmiðlum drægju ekki úr störfum nefndarinnar.

Þá vildi hann vita hvort skipan nefndarinnar endurspeglaði tilraun Viðreisnar til að losna undan kosningaloforðum sínum um sjávarútveginn.

Benedikt sagðist sannfærður um að allir gengju heilir til verksins og sagði ekkert óþægilegt að menn töluðu á móti starfi nefndarinnar áður en það hæfist. Hitt væri verra ef menn töluðu á móti starfinu eftir að það hæfist.

Þá sagði ráðherra vissulega rétt að stjórnarflokkarnir þrír væru ekki sammála um allt. Þeir hefðu hins vegar myndað ríkisstjórn um ákveðin málefni og t.d. freistað þess að setja umrætt mál í sáttarfarveg.

Sagði Benedikt fáa telja að fiskveiðistjórnunarkerfið í núverandi mynd væri líklegt til að standast til framtíðar.

• Blogga um frétt