Síldin er fyrr á ferðinni í ár

Bráðabirgðaniðurstöður Hafrannsóknastofnunar eftir þriggja vikna könnunarleiðangur sýna mun meiri útbreiðslu og magn norsk-íslenskrar síldar innan landhelginnar austur af landinu en verið hefur síðastliðin vor.

Síldin er fyrr á ferðinni en áður og er gengin vestar, samkvæmt því sem fram kemur á vef stofnunarinnar.

Segir þar að meginmarkmið leiðangursins hafi verið að meta magn og útbreiðslu norsk-íslenskrar síldar og kolmunna austur og norðaustur af landinu.

„Umfangsmiklar mælingar voru einnig gerðar til að kanna ástand hafsins og vistkerfisins, m.a. með rannsóknum á magni átustofna.“

2013-árgangurinn stór?

Leiðangurinn er árlegur og var nú farinn 23. árið í röð, en auk Íslendinga taka þátt í honum rannsóknarskip frá Noregi, Færeyjum, Danmörku og Rússlandi.

„Í íslenska hluta leiðangursins fannst nær eingöngu eldri hluti stofnsins, einkum 12 og 13 ára gömul síld, sem hefur verið uppistaðan í veiði undanfarinna ára. Austar í hafinu, undan ströndum Noregs, hafa önnur rannsóknarskip fundið yngri síld.

Er það einkum árgangur frá 2013 en vísbendingar frá fyrri leiðöngrum hafa bent til að hann kunni að vera stór. Úrvinnsla gagna frá leiðangri þessa árs mun leiða það betur í ljós,“ segir á vef stofnunarinnar.

Ekki efni til að álykta um makrílgengd

„Á Íslands-Færeyjahryggnum varð vart við kolmunna, svo og í hlýsjónum suðaustur af Jan Mayen (mynd 2). Þéttleikinn var að öllu jöfnu lítill. Kolmunninn var blandaður að stærð en var öllu smærri norðar. Nær ekkert varð vart við makríl í leiðangri Árna Friðrikssonar í ár en á undanförnum árum hafa einungis fáeinir fiskar fengist í einstaka togum milli Íslands og Færeyja. Þessar niðurstöður gefa því ekki tilefni til að álykta eitthvað um makrílgengd inn á íslensk hafsvæði í sumar.“

• Blogga um frétt