Panta togara fyrir 4,9 milljarða króna

Skrifað hefur verið undir samning vegna smíði á rúmlega 81 metra löngum og 17 metra breiðum frystitogara fyrir HB Granda við spænsku skipasmíðastöðina Astilleros Armon Gijon.

Samningsverðið er 44.327.000 evrur, eða jafnvirði 4,9 milljarða íslenskra króna. Afhending togarans er áætluð um mitt ár 2019 en stefnt er að því að skipið verði þá stærsti og einn fullkomnasti flakafrystitogarinn sem gerður verður út við norðanvert Atlantshaf.

Það var Vilhjálmur Vilhjálmsson, forstjóri HB Granda, sem skrifaði undir samninginn af hálfu félagsins á föstudag, auk fulltrúa spænsku stöðvarinnar sem staðsett er á Norður-Spáni. Byrjað verður á smíðinni um miðjan september þannig að smíðatíminn verður tæplega tvö ár, að því er fram kemur á vef HB Granda.

Framleiðslugetan er áætluð rúm 100 tonn á sólarhring og þá verður fiskimjölsverksmiðja um borð fyrir ýmislegt sem fellur til við flakavinnsluna og verður afkastageta hennar um 50 tonn á sólarhring. Í frystilestum verður rými fyrir allt að 1.000 tonn af afurðum, flokkuð á brettum.

Sjá nánar á vef HB Granda.

• Blogga um frétt