Gulltoppur tæmdur og réttur við

Lokið hefur verið við að dæla vatni úr Gulltoppi GK, sem liggur við bryggju Akraneshafnar. Vart varð við leka um borð í skipinu snemma í morgun en þá var það þegar farið að hallast töluvert. Nú hefur það verið rétt við að nýju.

Frétt af mbl.is

Leki kominn að Gulltoppi

Að sögn Einars Guðmundssonar hjá Akraneshöfn hóf Björgunarfélag Akraness að dæla úr skipinu í morgun og fékk síðar til liðs við sig slökkvilið bæjarins.

Skipið mun hafa verið við bryggjuna í nokkrar vikur en Einar segir að eigendur skipsins bíði þess að fá pláss í slipp. Ekki er vitað hvort tekist hafi að koma að fullu í veg fyrir lekann og því gæti jafnvel þurft að dæla að nýju úr skipinu.

Gulltoppur er tiltölulega nýkominn til landsins frá Noregi og er í skipaskrá flokkaður sem björgunarskip. Honum mun ekki ætlað að fara á fiskveiðar heldur ferja ferðamenn í hvalaskoðun.

• Blogga um frétt