Útlendingar í stað Íslendinga á sjó

Mjög erfiðlega gengur að manna línubáta vegna lágs afurðaverðs og hefur Einar Hannes Harðarson, formaður Sjómannafélags Grindavíkur, áhyggjur af því að það sé aðeins byrjunin og næst verði það ísfisktogararnir, frystiskipin og loks uppsjávarskipin.

Ástæðan er samkeppni við atvinnu í landi enda margir iðnmenntaðir sem fóru á sjóinn í efnahagskreppunni en geta nú fengið hærri laun í landi. „Alltaf þegar það verður niðursveifla fáum við mikið af iðnmenntuðum á sjóinn, en þegar þensla er þá eru þeir fyrstir manna frá borði,“ segir Einar Hannes en það hafa helst verið útlendingar sem manna plássin.

„Útlendingarnir byrja margir á línubátum en er síðan hleypt á önnur skip,“ segir Einar en hátt í 25 prósent af félagsmönnum Sjómannafélags Grindavíkur eru útlendingar og hefur fjöldi þeirra allt að fjórfaldast á tveimur árum að hans sögn.

Mánaðarlaun á línubát eru sjö til átta hundruð þúsund krónur ef menn taka alla túra. „En þá ertu gersamlega uppgefinn, 13 til 14 tíma vinnudagur og nánast engin hvíld,“ segir Einar.

Einar Hannes Harðarson, formaður Sjómannafélags Grindavíkur. mbl.is

• Blogga um frétt