Ný mathöll fyrirhuguð á Grandagarði

Ráðgert er að á næsta ári verði opnuð mathöll í húsnæði Sjávarklasans á Grandagarði. Um er að ræða rúmlega 500 fermetra rými í suðvesturenda á jarðhæð húsnæðis, sem áður hýsti þjónustu HB Granda við skip fyrirtækisins.

Þór Sigfússon, stjórnarformaður Sjávarklasans, áætlar að þarna geti verið allt að tíu básar eða söluvagnar sem leggi áherslu á nýjungar í ýmsum göturéttum. Þá verður einnig vinnuaðstaða fyrir frumkvöðla sem tengjast sjávarútvegi og matvælagreinum.

„Við viljum gjarnan að þessi starfsemi verði viðbót við staðina, sem fyrir eru á Grandanum. Áhersla verður lögð á frumkvöðlastarfsemi. Þarna eiga fyrirtækin að fá tækifæri til að þróa eitthvað nýtt í göturéttum eða skyndibitum úr íslensku hráefni. Staðurinn er ekki síst hugsaður fyrir Íslendinga, sem þarna geta kynnst þeim verðmætum sem við erum með í höndunum,“ segir Þór.

Hann segist þegar hafa orðið var við mikinn áhuga, en í auglýsingu frá Sjávarklasanum eru áhugasamir beðnir að senda upplýsingar og hugmyndir fyrir 2. október. Þar kemur fram að í Mathöllinni á Granda verði básar og vagnar með nýstárlegum göturéttum, „sem innihalda það besta sem miðin og landið gefa af sér.“

Grófari staður en á Hlemmi

Einnig verður þarna aðstaða fyrir matarfrumkvöðla til að vinna að sínum hugmyndum. Þór segir að ekki skemmi fyrir að úr húsnæðinu sé einstakt útsýni yfir höfnina.

Bætir hann við að fyrirmyndin sé m.a. sótt til Copenhagen Street Food og Vippa í Ósló í Noregi. Staðurinn verði hrárri heldur en Mathöllin á Hlemmi, sem var opnuð í sumar. Íslenski sjávarklasinn á meirihluta í fyrirtækinu sem leigir húsið á Hlemmi af borginni og fram leigir síðan aðstöðu til þeirra sem reka staðina.