Stofnvísitölur þorsks og gullkarfa hafa aldrei verið hærri frá því mælingar hófust árið 1996. Þetta sýna nýjar niðurstöður stofnmælingar botnfiska sem gerð var í haust, en greint er frá þeim í tilkynningu frá Hafrannsóknastofnun.
Fram kemur þar að vísitala ýsu sé nú nálægt meðaltali sama tímabils, og að vísitala veiðistofns djúpkarfa hafi hækkað undanfarin ár eftir sögulegt lágmark en nýliðun sé áfram mjög léleg.
„Vísitala veiðistofns grálúðu hefur hækkað jafnt og þétt frá árinu 2006 þegar hún var í lágmarki. Stofnvísitölur margra tegunda, eins og ufsa, langlúru, skarkola, þykkvalúru, keilu, löngu, gulllax og litla karfa mældust háar og í mörgum tilfellum þær hæstu frá árinu 1996. Stofnar hlýra, tindaskötu og skrápflúru eru hins vegar í sögulegu lágmarki,“ segir í niðurstöðunum.
Ljósafellið í Eyjafirði í rallinu í haust.
mbl.is/Hafþór Hreiðarsson
Togað með botnvörpu á 375 stöðum
Stofnmælingin eða haustrallið fór fram dagana 4. október til 9. nóvember, en rannsóknasvæðið var umhverfis Ísland á allt að 1.500 metra dýpi. Alls var togað með botnvörpu á 375 stöðum en rannsóknaskipið Árni Friðriksson RE og togarinn Ljósafell SU voru notuð til rannsóknarinnar.
Niðurstöðurnar eru sagðar mikilvægur þáttur í árlegri úttekt Hafrannsóknastofnunar á ástandi helstu nytjastofna við landið, sem lýkur með veiðiráðgjöf í júní á næsta ári.
„Helsta markmið haustrallsins er að styrkja mat á stofnstærð botnlægra nytjastofna á Íslandsmiðum með sérstakri áherslu á djúpkarfa, grálúðu og aðra djúpfiska. Auk þess er markmiðið að fá annað mat, óháð aflagögnum, á stofnstærð þeirra nytjastofna sem stofnmæling botnfiska á Íslandsmiðum (marsrall) nær yfir, og safna upplýsingum um útbreiðslu, líffræði og fæðu tegundanna.“