Þyrla send vegna slasaðs sjómanns

Þyrla Landhelgisgæslunnar var í nótt send til Vestmannaeyja til að sækja sjómann sem hafði slasast um borð í fiskiskipi undan suðurströnd landsins. Skipið sigldi til Vestmannaeyja þar sem læknir á staðnum, í samráði við þyrlulækni Landhelgisgæslunnar, taldi réttast að flytja manninn til Reykjavíkur.

Barst stjórnstöð Gæslunnar beiðnin laust fyrir klukkan tvö í nótt, en vegna veðurs var ekki hægt að senda sjúkraflugvél til Eyja og því sótti þyrlan TF-LIF þann slasaða.

Þyrlan fór í loftið frá Reykjavíkurflugvelli upp úr klukkan hálfþrjú og lenti á flugvellinum í Vestmannaeyjum um fjörutíu mínútum síðar. Þar var stormur, mikil úrkoma og skýjahæðin aðeins um 500 fet. Eftir að sjúklingurinn hafði verið búinn undir flutning lagði TF-LIF aftur af stað til Reykjavíkur um hálffjögurleytið. Þyrlan lenti svo á Reykjavíkurflugvelli klukkan 04.21 þar sem sjúkrabíll beið og flutti manninn á sjúkrahús.

• Blogga um frétt