Iceland Seafood International hefur náð samkomulagi við félögin GPG seafood ehf. og IceMar ehf. um kaup á spænska fyrirtækinu Elba S.L., sem framleiðir og selur léttsaltaðar þorskafurðir. Þetta kemur fram í tilkynningu frá Iceland Seafood, en þar segir einnig að kaupin séu háð hefbundnum fyrirvörum um áreiðanleikakönnun og samþykki stjórnar.

Kaupverðið hljóðar upp á 4,4 milljónir evra, jafnvirði rúmlega 600 milljóna íslenska króna og greiðist það að hálfu með reiðufé og að hálfu með nýjum hlutabréfum í Iceland Seafood. GPG seafood og IceMar munu þannig eignast um 1,2% hlut í Iceland Seafood þegar og ef salan gengur í gegn, en áformað er að Iceland Seafood taki við spænska fyrirtækinu í árslok.

Framleiðir og selur léttsaltaðar þorskafurðir

„Staða Elbu á Spánarmarkaði er sterk en félagið framleiðir og selur léttsaltaðar þorskafurðir. Félagið er staðsett í Barcelona og selur um 2.200 tonn af afurðum á ársgrundvelli. Félagið selur vörur undir vörumerkinu ElBa, sem hefur sterka ímynd á markaði sem gæðavara. Áætluð sala félagsins er um €14,5 milljónir í ár og EBITDA er áætluð um €450 þúsund,“ segir í tilkynningu Iceland Seafood um þessa væntanlegu eign félagsins.

Bjarni ánægður með kaupin

„Elba verður frábær viðbót við þá starfsemi sem við rekum á Spáni og gerir okkur kleift að nýta enn frekar okkar sterku dreifileiðir og framleiðslu á þessum stærsta markaði fyrir íslenskar þorskafurðir. Við trúum því að þessi viðskipti verði til hagsbótar fyrir hluthafa okkar, viðskiptavini og birgja. Kaupin eru í fullu samræmi við stefnu okkar um að leggja áherslu á vöxt á okkar lykilmörkuðum þar sem við höfum nú þegar sterkan grunn og markaðsstöðu. Á sama tíma vil ég bjóða GPG Seafood og IceMar velkomin í hluthafahópinn og við bjóðum starfsmenn Elba á Spáni velkomin í Iceland Seafood fjölskylduna. Við hlökkum til samstarfsins,“ haft eftir Bjarna Ármannsyni, forstjóra Iceland Seafood í tilkynningu.

Þar lýsa þeir Gunnlaugur Hreinsson og Gunnar Örlygsson, stjórnarformenn GPG Seafood og IceMar einnig yfir ánægju með viðskiptin.

Tengdar fréttir

Iceland Seafood

Samþykktu hækkun vaxta í 13%

• Birna í stjórn Iceland Seafood
• Biðja kröfuhafa um leyfi til að selja IS UK
• Brim kaupir hlut Bjarna í Iceland Seafood
• Reksturinn í Bretlandi seldur á þúsund pund

» Fleiri tengdar fréttir

• 1 blogg um fréttina

Bloggað um fréttina

• Örn Gunnlaugsson: Bjöllusauðir?