Samgöngudeild Lundúnaborgar (TfL) hefur ákveðið að endurmála ekki afmáðar hvítar veglínur. Ástæðan er sú að athugun á hennar vegum hefur leitt í ljós að það dragi úr umferðarhraða að fjarlægja línur sem skilja vegarhelmingana í sundur.
Eftir að þrjár götur höfðu verið malbikaðar á ný var ákveðið að sleppa því að mála miðlínu á þær. Afleiðingin varð sú að verulega dró úr meðalhraða bíla sem um þessar götur fóru. Munaði þar 8 til 15%.
Niðurstöðurnar komu á óvart en ein kenningin er sú að miðlínurnar auki sjálfsöryggi ökumanna og fullvissu þeirra fyrir því að aðrir bílar muni ekki seilast inn yfir hana og á þeirra akrein. Með því að fjarlægja línurnar aukist óvissa sem endurspeglist í minni hraða.
Rannsóknin leiddi einnig í ljós að ökumenn hægðu enn frekar ferðina þegar þeir mættu bíl sem ekið var í gagnstæða átt. TfL segist engin áform hafa um að uppræta almennt miðlínur gatna. Það yrði aðeins gert þar sem það væri talið viðeigandi.
agas@mbl.is