Tveir bílar af gerðinni Nissan 370Z settu um síðustu helgi nýtt met í skrensi, sem líka gengur undir enska heitinu drift.
Aldrei áður hefur tveimur bílum verið driftað svo langt samtímis og hlið við hlið í sömu braut. Lögðu Z-bílar Nissan að baki 28,52 kílómetra.
Atburðurinn átti sér stað í furstadæminu Dubai og gefur myndskeið sem fylgir þessari frétt svolitla mynd af uppátækinu.
Nissan 370Z er búinn V6-vél og er einstaklega vinsæll til keppni í drifti og þykir metið meðal annars skýra þær vinsældir.
Lengsta drift eins bíls er 143,28 km en þeim árangri náði ökumaður að nafni Harald Müller í Tyrklandi fyrr í ár. Hraðasta drift sögunnar mun vera skrens pólska ökumannsins Jakub Przygonski sem skrensaði á 216,7 km/klst hraða í Póllandi í fyrra.
Þá er til met fyrir kleinuhringi í hóp. Alls tóku 107 bílar þátt i slíku skrensi á uppákomu árið 2012.