Þriðju hverja mínútu á fyrri helmingi ársins rann nýr bíll af færibandinu einhvers staðar í Bretlandi, en þar starfrækir fjöldi bílaframleiðenda bílsmiðjur.
Afköst af þessu tagi þekkja þarlendir frá því fyrir kreppu en alls voru smíðaðir 793.642 nýir bílar í bresku bílsmiðjunum frá áramótum til júníloka. Það er þó ekki nema 0,3% aukning frá í fyrra en meira hefur ekki verið smíðað af nýjum bílum þar í landi á fyrri árshelmingi frá 2008. Og magnið í ár er rúmlega 50% meira en á fyrri helmingi ársins 2009 er lamandi hönd fjármála- og efnahagskreppunnar hafði sagt til sín.
Rúmlega þrír fjórðu bílanna sem Bretar smíðuðu fóru til útflutnings en fyrir heimamarkað urðu 188.598 eftir, eða 13,7% fleiri en á sama tímabili í fyrra.
En hvaða bílar skyldu svo vera smíðaðir í Bretlandi? Þegar listinn yfir þá er skoðaður kemur býsna fjölbreytt flóra í ljós af bílum í öllum stærðar- og gæðaflokkum.
Mini – Hatch, Clubman, Coupe og Roadster eru smíðaðir í Oxford.
Honda – Civic, CRV og Jazz eru smíðaðir í Swindon.
Toyota – Auris og Avensis verða til í Burnastone í Derbyskíri.
Nissan – Juke, Qashqai, Note, Pulsar og Leaf eru framleiddir í Sunderland.
Jaguar – F-Type, XE, XJ, XF og XK smíðast í Vestur-Miðlöndum og í Liverpool.
Land Rover – Defender, Discovery, Discovery Sport, Evoque, Freelander, Range Rover, Range Rover Sport eru smíðaðir í Solihull í Vestur-Miðlöndum og Halewood við Liverpool.
Aston Martin – DB9, Rapide, Virage, DBS og one-77 í Gaydon í Warwickskíri.
Bentley – Continental, Flying Spur og Mulsanne eru smíðaðir í bænum Crewe.
Rolls Royce – Ghost, Phantom og Wraith verða til í Goodwood.
MG – 3 og 6 eru smíðaðir í Longbridge-smiðjunni í Birmingham.
Lotus – Elise, Evora og Exige sjá dagsins ljós í Norfolk.
Vauxhall – Astra er smíðuð í Ellesmere Port og Vivaro-atvinnubíllinn í Luton.
Morgan – Aero, 4/4, Plus 4, Plus 8, Roadster, 4 sæta, 3ja hjóla.
Caterham – Seven.
Mclaren – MP4-12C og P1. agas@mbl.is