Flestir endurnýja rafbíl með rafbíl

Samkvæmt niðurstöðum rannsóknar sem unnin var fyrir bandaríska bílrisann Ford snúa langfæstir kaupendur rafbíla til baka til hefðbundinna bíla með brunavél er þeir endurnýja farartæki sín.

Ekki minna en 92% neytenda sem brúka rafbíla munu kaupa annan rafbíl þegar þeir telja tímabært að endurnýja. Og séu eigendur tengiltvinnbíla taldir með þá hækkar hlutfallið í 94% sem munu halda sig við mengunarfrían bíl.

Könnunin náði til 10.000 eigenda rafbíla og meðal þess sem þeir hafa hrifist af í fari rafbíla er hin mikla og tafarlausa snerpa sem þeir búa yfir. Sömuleiðis hafa þeir fallið fyrir hinni hreinu tækni sem bílarnir byggjast á. Í ljós kom að drjúgur meirihluti fjölskyldna á annan bíl en rafbílinn og er þá í flestum tilvikum um bíl með brunavél að ræða. Var hann venjulega notaður til lengri ferðalaga.

Það sem vantar inn í þessa mynd, er að sala á hreinum rafbílum og tengiltvinnbílum hefur skroppið saman í Bandaríkjunum í ár. Meginskýringin á því er verðlækkun á bensíni en verð á því hefur haldist stöðugt lægra í ár en í fyrra. Það hefur valdið mikilli aukningu á sölu jepplinga, jeppa og pallbíla sem allir eru sparneytnari í seinni tíð vegna framfara í véltækni. Greinendur segjast ekki sjá fyrir sér að skerfur rafbíla á bílamarkaði aukist í náinni framtíð.

agas@mbl.is