Juan Pablo Montoya, fyrrum keppandi í formúlu-1, setti heimsmet um helgina á Bugatti Chiron ofurbíl. Er hann fyrstur manna til að aka raðsmíðabíl á 400 km/hraða; á bíl til aksturs á vegum en ekki bara kappakstursbrautum.
Metið er fólgið í því að taka af stað úr kyrrstöðu og ná 400 km ferð og bremsa síðan sem fljótast. Það tókst honum að ljúka á 41,96 sekúndum en á þeim tíma lagði hann að baki 3,1 kílómetra.
Montoya keppti í hinum bandaríska systurkappakstri formúlu-1 og síðar í NASCAR að lokinni keppni í formúlu-1. Varð hann bandarískur meistari í Indycar kappakstrinum en helstu afrek hans eru þó sigur í Indianapolis 500 kappakstrinum og það tvisvar. Þá hefur hann þrisvað hrósað sigri í sólarhringskappakstrinum í Daytona í Flórída og í formúlu-1 vann hann meðal annars Mónakókappaksturinn.
„Þetta var frábært að sjá að það þarf ekki mikinn og flókinn undirbúning eins og í kappakstri þegar lagt er til atlögu við 0-400-0 metið. Þetta var allavega auðvelt og létt á Chiron, setjast bara um borð og taka af stað. Stórkostlegt,“ sagði Montoya. Hann hafði ekki fyrir því að skrýðast keppnisgalla og hjálmi, heldur mætti til leiks í gallabuxum og á hvítri skyrtu.
Næst mun franska Bugatti-smiðjan freista þess að slá hraðasta met framleiðslubíls sem hljóðar upp á 431,072 km/klst. Það met setti Bugatti Veyron ofursportbíll árið 2010.
Í aflrás Bugatti Chiron er að finna átta lítra og 16 strokka w-laga vél sem skilar 1.500 hestöflum til hjólanna. Í metakstrinum náði Montoya 100 km ferð eftir 2,4 sekúndur, 200 km eftir 6,1 sekúndu, 300 km eftir 13,1 sekúndu og loks 400 km eftir 32,6 sekúndur.
Meðan hann var í æfingabrautinni löngu prófaði Montoya hvað koma mætti bílnum á mikla ferð og sýndi hraðamælirinn um stund 420 km/klst. Er það meiri hraði en hann náði nokkru sinnum í kappakstri í formúlu-1, Indycar og NASCAR.
Bugatti Chiron er arftaki Veyron-bílsins en hann er nefndur eftir franska ökumanninum Louis Chiron, sem keppti fyrir Bugatti á fjórða áratug síðustu aldar. Er hann elsti ökumaðurinn til að keppa í formúlu-1. Var hann 56 ára gamall er hann vann það afrek árið 1955 og varð sjötti í mark í Mónakó.
Meðfylgjandi myndskeið er frá hraðameti Bugatti Chiron og Montoya: