Eiki trónir sem fyrr á toppnum

Það er lítið um sviptingar á Lagalistanum þessa 13. viku ársins – nánast hægt að ljósrita listann frá vikunni áður. Sömu fimm lögin skipa sér í sömu fimm efstu sætin og aðeins einn nýliði laumar sér inn. Það er lagið í 15. sæti, „Þú veist í hjarta þér" með reggítöffurunum í Hjálmum sem héldu einmitt endurkomutónleika í síðasta mánuði sunnan og norðan heiða.

Eiríkur rauði virðist vera búinn að koma sér makindalega fyrir í toppsætinu með Evróvisjónframlag Íslendinga í ár í farteskinu, „Ég les í lófa þínum". Er þetta fimmta vikan í röð sem lagið trónir á toppnum og verður spennandi að sjá hvort það sitji þar jafnvel sem fastast fram yfir Evróvisjón.

Það kemur heldur ekki á óvart að Mika heldur öðru sætinu. Landinn virðist ekki fá leið á lagi hans „Grace Kelly" enda frábært lag á ferðinni sem kemur öllum í gott skap. Söngvakeppnislögin „Ég og heilinn minn" og "Eldur" halda svo sínum hlut.