Eiríkur Hauksson fékk sárabætur í Helsinki

Íslensku Evróvisjónfararnir settu af stað veðbanka um hverjir stæðu uppi sem sigurvegarar í söngvakeppninni sem fór fram í Helsinki á laugardaginn. Þátttakendur í veðmálinu lögðu 20 evrur í púkk og nefndu svo hvaða þrjú lög þeir teldu að myndu hafna í þremur efstu sætunum, en röð laganna skipti þó ekki máli.

Svo fór að Eiríkur Hauksson stóð uppi sem sigurvegari, en hann var með öll löndin rétt, það er að segja Serbíu, Úkraínu og Rússland. Eiríkur fékk um 35.000 krónur í sinn hlut fyrir sigurinn.

Svipað veðmál var sett af stað í kringum undankeppnina, en þar hafði Sigmar Guðmundsson sjónvarpsmaður sigur. Sigmar hafði sjö af tíu efstu lögunum rétt, og hlaut um 30.000 krónur í sigurlaun.