Hjónin fyrrverandi, Tom Cruise og Nicole Kidman verða bæði við kvikmyndatökur í Berlín í Þýskalandi í september samkvæmt þýska dagblaðinu Bild.
Cruise kom til Berlínar fyrr í þessum mánuði er tökur hófust á kvikmyndinni „Valkyrie", en styr hefur staðið um framleiðslu á myndinni sem er leikstýrt af Brian Singer. Myndin fjallar um nasistaforingjann Claus von Stauffenberg sem reyndi ásamt hópi herforingja að ráða Adolf Hitler af dögum árið 1944. Tökur standa yfir í Þýskalandi til loka október. Þjóðverjar hafa verið mótfallnir því að myndin væri tekin upp í Þýskalandi þar sem leikarinn Tom Cruise er af ýmsum lágt skrifaður í Þýskalandi, ekki síst vegna tengsla hans við Vísindakirkjuna.
Samkvæmt Bild mun Kidman koma til Berlínar í september til þess að vinna að gerð kvikmyndar sem byggir á bókinni „Der Vorleser", sem nefnist Lesarinn í íslenskri þýðingu Arthúrs Björgvins Bollasonar, eftir þýska rithöfundinn Bernhard Schlink.
Kidman og Cruise skildu árið 2001. Á síðasta ári gengu þau bæði í hjónaband á ný. Hann kvæntist Katie Holmes og hún giftist Keith Urban.