Súellen gabbaði aðdáendur sína

„Þetta var alvöru hrekkur og ég var tekinn," sagði Guðmundur Rafnkell Gíslason, söngvari hljómsveitarinnar Súellenar, á bloggsíðu sinni í gær. Aðdáendur sveitarinnar ráku upp stór augu á mánudag þegar Guðmundur bloggaði um að félagar hans hefðu rekið hann úr hljómsveitinni.

Guðmundur sagðist hafa fengið SMS-skilaboð aðfaranótt sunnudags sem sögðu að hann væri ekki lengur í hljómsveitinni og að eftirmaður hans væri þegar fundinn. „Ég hefði nú þegið það að vera boðaður á fund, til að ræða málin. Mér finnst ég nú eiga það skilið eftir 25 ára farsælt starf," sagði Guðmundur á bloggsíðunni.

Nú hefur komið á daginn að það eru fleiri hrekkjalómar á Íslandi en Auðunn Blöndal og Vífill Atlason frá Akranesi. Guðmundur bloggaði um málið til að stríða félögum sínum með kvikindislegum brandaranum.Bjarni Halldór Kristjánsson, gítarleikari Súellenar, segir í samtali við 24 stundir að hrekkurinn hefði heppnast ótrúlega vel. „Gummi hefndi sín á mér með því að skrifa bloggið," segir Bjarni og hlær. „Hann fattaði strax að við vorum að hrekkja hann. Okkur óraði ekki fyrir að það yrði svona mikið fjaðrafok."

• 1 blogg um fréttina

Bloggað um fréttina

• Guðmundur Rafnkell Gíslason: Ferð án enda!