Arthur C. Clarke á þrjár óskir

Breski vísindaskáldsagnahöfundurinn Arthur C. Clarke lagði fram þrjár óskir á níræðisafmælinu sínu, sem hann hélt upp á í Colombo á Sri Lanka, þar sem hann býr. Að mannkynið nýti hreinni orkuauðlindir, friður komist á á Sri Lanka og vísbendingar finnist um líf á öðrum hnöttum.

„Ég hef alltaf verið sannfærður um að við séum ekki ein í alheiminum,“ sagði Clarke, sem líklega er þekktastur fyrir skáldsöguna 2001: A Space Odyssey, sem Stanley Kubrick gerði ódauðlega í kvikmynd.

Nokkrir vísindamenn, geimfarar og embættismenn komu saman í Colombo í dag til að fagna afmæli Clarkes. Í ávarpi sem hann flutti sagði hann að mannkynið biði þess að verur á öðrum hnöttum „hafi samband við okkur eða gefi okkur merki. Við getum engan veginn vitað hvenær þetta kann að gerast. Ég vona að það verði fyrr en síðar.“

• 1 blogg um fréttina

Bloggað um fréttina

• Mofi: Hvers óskar þú þér frammi fyrir dauðanum?