Fær bætur fyrir að missa fegurðartitil

Héraðsdómur Reykjavíkur komst að þeirri niðurstöðu í dag að Arnar Laufdal og Fegurðarsamkeppni Íslands skuli greiða Ólafi Geir Jónssyni 500 þúsund krónur í miskabætur fyrir að svipta hann titlinum herra Ísland árið 2005. 

Dómnum þótti sýnt, að  Ólafur hafi verið sviptur titlinum hr. Íslands 2005
á ólögmætan hátt. Sviptingin hafi auk þess verið meiðandi fyrir Ólaf. Taldi dómurinn sýnt að í sviptingunni og hvernig að henni hafi verið staðið hafi falist meingerð gegn persónu Ólafs.

Forsvarsmönnum keppninnar þótti á sínum tíma Ólafur Geir haga sér með þeim hætti í sjónvarpsþættinum Splash, að hann gæti ekki lengur borið titilinn.

Ólafur segist vera ánægður með niðurstöðuna enda hafi sviptingin verið óréttmæt  og meiðandi fyrir sig.  Einkum hafi fullyrðingar sem fram komu í fréttatilkynningum sem forsvarsmenn fegurðarsamkeppninnar sendu til fjölmiðla verið afar meiðandi, enda ósannar eins og dómurinn hafi nú staðfest.

Ólafur Geir ætlar að halda upp á þetta á föstudagskvöld á skemmtistaðnum NASA við Austurvöll, með plötusnúðinum Dave Spoon, sem hann flutti inn til landsins til að halda upp á eins árs afmæli fyrirtækisins Agent.is. Fyrirtækið sér um skipulagningu skemmtana, innflutning á tónlistarfólki o.fl.

• 3 blogg um fréttina

Bloggað um fréttina

• Stefán Friðrik Stefánsson: Umdeildur Herra Ísland endurheimtir æruna
• Dögg Pálsdóttir: Umhugsunarefni
• Jón Finnbogason: 1. einkunn fyrir almannatengsl