Sprautaði Justin Timberlake í rassinn

Söngkonan Madonna hefur lýst því yfir að hún muni ekki syngja lag sitt „Like a Virgin“ aftur nema henni verði boðin himinhá peningaupphæð í staðinn.

„Ég er ekki viss um að ég geti sungið „Holiday“ eða „Like a Virgin“ aftur, ekki nema einhver rússneskur auðjöfur sé til í að borga mér 30 milljónir dala fyrir að taka þessi lög í brúðkaupinu sínu. En annars ekki.“

Madonna upplýsti einnig í sama viðtali að hún spili alltaf nýjustu plötu Britney Spears Blackout þegar hún geri æfingarnar sínar. „Mér finnst nýja platan hennar frábær. Ég hlusta iðulega á plötuna þegar ég geri Pilates- og eróbikk-æfingarnar mínar.“

Þá viðurkenndi söngkonan að hún hefði gefið Justin vítamínsprautu í rasskinn þegar söngvarinn vann með henni að laginu „4 Minutes“ en það hafi hún alls ekki gert til þess eins að berja þjóhnappa hjartaknúsarans augum. „Fyrir það fyrsta hef ég séð fullnóg af rössum um ævina. Ástæðan fyrir því að ég sprautaði hann með B-12 vítamíni var sú að hann hafði kvartað undan kvefi og ég ætlaði ekki að veita honum þá afsökun að hann gæti ekki komið til vinnu vegna veikinda. Það hefur ekkert með rassinn hans að gera og ég hefði vel getað fengið hann úr buxunum án þess að sprautunnar hefði notið við.“

Madonna vildi heldur ekki staðfesta orðróm um að hjónaband hennar og leikstjórans Guy Ritchie stæði á brauðfótum en sagði þó að þau hjónin ynnu í sínum málum eins og öll hjón. „Við þurfum enn að koma til móts við hvort annað. Og það er ekki auðveldur leikur.“