Fjör á uppboði stjarnanna í Cannes

Yfir tíu milljónir Bandaríkjadala, 724 milljónir króna, söfnuðust á uppboði í gærkvöldi í Cannes til styrktar rannsókna á alnæmi. Margar stjörnur lögðu málefninu lið þar á meðal Madonna sem hreinsaði til í handtöskunni áður en uppboðið hófst.

Meðal muna sem Madonnu sem seldust á uppboðinu er spegill, hárspenna, blautklútur og varagljái auk handtöskunnar sem er frá Chanel. Munir Madonnu seldust á 300 þúsund evrur, 34 milljónir króna. Söngkonan fór vinsamlegast fram á það við þá sem hygðust taka þátt í uppboðinu að þeir myndu ekki móðga hana með því að bjóða einhverja smáaura. „Þessi varagljái snerti varir mínar," sagði Madonna.

Stjörnurnar lögðu sig allar fram á uppboðinu. Mary J. Blige söng lögin Family Affair og lag U2 One.  Dita Von Teese seldi silkisokka sína og afklæddist þeim á meðan boðið var í sokkana að hætti dansmeyja. Sharon Stone stjórnaði uppboðinu og reyndi að fá fólk til þess að bjóða í koss frá Madonnu. Minnti hún gesti á að George Clooney hafi selt tvo kossa á uppboðinu í fyrra á 700 þúsund dali.

„Það er allt of lítið," sagði Madonna. „Það hafa allir kysst George Clooney," bætti hún við. Sagðist Madonna ekki kyssa fyrir minna en eina milljón dala.