„Aldrei verið í krossferð gegn auglýsingum“

Nokkuð hefur verið um það rætt að lag eftir Megas hljómar undir í auglýsingu frá Toyota-umboðinu; þar sem sýndar eru ýmsar norðurpólshremmmingar hljómar undir lagið „Ef þú smælar framan í heiminn“ í nýrri upptöku Megasar.

Að sögn Megasar er þetta ekki í fyrsta sinn sem lagið er notað í auglýsingaskyni, eða réttara sagt setningin úr viðlaginu því hana má finna á Cheerios-pakka, en kannski hafi enginn tekið eftir því. „Ég gaf þeim það nú,“ segir Megas og vísar í Cheeriosið, „enda fannst mér gaman að því að menn skyldu vilja nota þessa setningu, ekki síst í ljósi þess að það veit enginn hvað hún þýðir í dag.“

Dr. Gunni er einn þeirra sem hefur gert umrædda auglýsingu að umræðuefni og segir m.a. á bloggsíðu sinni að með þessu sé síðasta arðan komin í kjaft kapítalista.

Sjálfur segist Megas gera skýran greinarmun á lagi og persónu og þannig hyggist hann ekki leika í auglýsingum. „En vel má vera að lög eftir mig hafi verið notuð í auglýsingum áður, ég bara man það ekki og það skiptir engu máli í sjálfu sér því ég hef aldrei verið í einhverri krossferð gegn auglýsingum.“