Búttaður Damon óttast titilsmissi

Bandaríski leikarinn Matt Damon er hræddur um að glata titlinum „kynþokkafyllsti karlmaður heims“, sem bandaríska tímaritið People veitti honum í fyrra. Damon hefur bætt á sig einum 15 kílóum og það ekki í formi vöðva.

Ástæðan fyrir þessu hamsleysi leikarans er kvikmyndin The Informant sem Steven Soderbergh leikstýrir. Í henni leikur Damon aðalhlutverkið, stjórnanda í lyfjafyrirtæki sem kemur upp um verðsamráð fyrirtækisins og annarra í lyfja- og fæðubótarefnaframleiðslu.

Damon segir hlutverkið ekki hafa krafist þess að hann væri feitur heldur „búttaður.“

Damon segir vel hafa gengið að fita sig með því að borða skyndibitafæði, drekka bjór og stunda enga líkamsrækt. Ben Affleck, besti vinur Damon, skemmtir sér vel yfir útlitsbreytingu vinar síns og segir hann nú þurfa tvö sæti í flugvél í stað eins áður.