Ávítaður fyrir að hirða afmælisboðskortin af börnunum

Sænska þingið hefur ávítað grunnskóla sem lagði hald á afmælisboðkort sem átta ára gamall drengur hafði afhent bekkjarfélögum sínum. Skólayfirvöld ákváðu að taka boðskortin í sína vörslu þegar það kom í ljós að allir krakkarnir í bekknum, fyrir utan tvo stráka, höfðu fengið boðskort.

„Kennararnir máttu ekki safna saman boðskortunum þvert á vilja nemandans,“ segir í úrskurði umboðsmanns sænska þingsins. Það er hins vegar tekið fram að skólanum verði ekki refsað fyrir þessa háttsemi.

Umboðsmaðurinn er kosinn af sænska þinginu, en honum er ætlað að tryggja það að yfirmenn opinberra stofnana, og starfslið þeirra, starfi skv. lögum.

Atvikið í Munspelets grunnskólanum í Lundi í Suður-Svíþjóð átti sér stað í maí sl. Kennararnir fyrirskipuðu nemendum sem fengu boðskort að skila þeim þar sem komið hafði í ljós að tveimur piltum hafði ekki verið boðið í afmælið.

Faðir afmælisdrengsins lagði fram kvörtun vegna málsins. Hann sagði við fjölmiðla að það hefði ekki átt að koma drengjunum á óvart að þeim skyldi ekki hafa verið boðið.

„Annar þeirra bauð ekki mínum syni í sitt afmæli og hinn hefur lagt son minn í einelti í hálft ár. Þú býður ekki óvinum þínum í afmælisveislu,“ sagði faðirinn í samtali við dagblaðið Sydsvenskan.

• Blogga um frétt