Þótti nasistabúningurinn flottur

Leikarinn Tom Cruise, sem leikur þýsku stríðshetjuna Claus von Stauffenberg í kvikmyndinni Valkyrie, segir í viðtali við breska dagblaðið Daily Mail að einkennisbúningar nasista hafi verið mjög flottir. „Ég verð að segja það, þeir klæddust mjög flottum einkennisbúningum. En það var að sjálfsögðu mjög einkennilegt að klæðast einum slíkum. Þeir notuðust við tákn sem voru í grunninn góðkynja en sneru þeim svo upp í andhverfu sína. Fyrstu viðbrögð mín voru: „Ég hata þessi föt.“ Hægt og bítandi fór ég hins vegar að venjast því þrátt fyrir að það væri mjög óhugnanlegt að klæðast þeim. “

Eitt af því sem Cruise varð að venjast fyrir hlutverkið var að ganga með lepp enda var Stauffenberg blindur á öðru auga eftir að hann varð fyrir sprengjubroti í Afríku. „Þegar við vorum að leiklesa handritið gekk ég með lepp og þegar ég þurfti til dæmis að fara á klósettið var upplitið á starfsfólkinu í kvikmyndaverinu mjög skrítið. Fólk vissi ekki hvaðan á sig stóð veðrið.“ Valkyrie verður sýnd í íslenskum kvikmyndahúsum í lok mánaðarins.