Innlent | mbl | 22.1.2009 | 15:02 | Uppfært 20:55

11 milljóna styrkur til Fjölsmiðjunnar

Afhending styrksins, fv. Bjarni Jóhannsson, rekstrarstjóri Nóatúns, Eysteinn Helgason, framkvæmdastjóri Kaupáss, Steinunn Jónsdóttir, formaður styrktarsjóðs Norvikur og Þorbjörn Jensson forstöðumaður Fjölsmiðjunnar.

Fjölsmiðjan fékk í dag afhentan 11 milljóna króna styrk en það er afrakstur af sölu bókar Nóatúns, Veisla með fjölskyldu og vinum.

Eysteinn Helgason, framkvæmdastjóri Kaupáss afhenti Þorbirni Jenssyni, forstöðumanni Fjölsmiðjunnar styrkinn. Framleiðsla bókarinnar var styrkt að fullu af styrktarsjóði Norvikur og Nóatúni.

Bókin var seld í öllum Nóatúnsverslunum fyrir jólin og fór allt söluandvirðið óskert til Fjölsmiðjunnar. Bókin seldist vel, varð í 5. sæti yfir mest seldu bækur á síðasta ári s.k.v. metsölulista Morgunblaðsins og í fyrsta sæti í sínum flokki.

Þorbjörn Jensson forstöðumaður segir styrkinn mikla lyftistöng fyrir unga fólkið í Fjölsmiðjunni á þessum erfiðu tímum. Styrkurinn hefur verið eyrnamerktar nýrri tónlistardeild, en það hefur verið draumur aðstandenda Fjölsmiðjunnar í mörg ár að stofna slíka deild. Þá er ætlunin að styrkja hússtjórnardeildina til muna, sérstaklega eldhúsið.

Fjölsmiðjan er vinnusetur fyrir ungt fólk sem stendur á krossgötum í lífinu. Þar gefst fólki tækifæri til að þjálfa sig fyrir almennan vinnumarkað eða áframhaldandi nám.