Fyrir fimm árum var enginn maður með mönnum nema að halda úti sinni eigin MySpace síðu. Þremur árum seinna höfðu margir skipt yfir í Facebook, enda fleiri möguleikar þar til að eyða tíma sínum í alls kyns leikjum eða sjálfsprófum auk þess sem auðveldara er að fylgjast með lífi annarra í gegnum fésbókina.

Nýjasta netæðið er vefsíðan twitter.com sem er tengslasíða er stólar eingöngu á svokölluð ör-blogg.

Þetta er því næsta skref textaboðs- tækninnar er menn tóku fyrst upp þegar stafræn tækni varð hluti af daglegu lífi mannsins. Þá með komu tölvupósta, sms-skilaboða eða msn-skilaboða.

Er þetta ekki eins og fésbókin?

Twitter virkar þannig að notandinn er beðinn um að svara einni einfaldri spurningu; „Hvað ertu að gera núna?“. Ætlast er til þess að þú sláir inn stutta lýsingu (hámark 140 slög) á því sem er í gangi hjá þér hverju sinni. Þannig getur þú leitað uppi þá notendur er þú vilt fá að fylgjast með eða fá upplýsingar af og sótt um að ör-bloggið þeirra birtist á þinni twitter-síðu. Fáir þú samþykki fer textinn þinn beint inn á síðu þeirra sekúndubrotum eftir að þú styður á enter-takkann.

Aðgerðin er í rauninni nákvæmlega sú sama og ástandsrákin (status bar) á Facebook býður upp á en virknin er þó önnur. Helsta ástæða þess er að á Twitter bjóða alls kyns stofnanir, tónlistarmenn, hljómsveitir, leikarar eða annað frægt fólk notendum að vera áskrifendur að ör-bloggum sínum. Þannig virkar Twitter sem skjót og skilvirk leið til þess að koma skilaboðum beint til þeirra er hafa áhuga á þér sem persónu eða því sem þú hefur upp á að bjóða.

Þarna er líka góð leið fyrir tónlistarfólk til þess að leyfa aðdáendum að fylgjast með því sem er í gangi hverju sinni. Margir tónlistarmenn eru duglegir við að senda inn ör-blogg, og þar á meðal nokkrir íslenskir. Hafa listamennirnir Björk, Ghostigital, Sprengjuhöllin, Sigur Rós, Amiina og Ólafur Arnalds öll kosið að nýta sér Twitter sem leið til að koma skilaboðum til aðdáenda sinna.