Hefði getað bjargað Richardson

Læknar telja að bjarga hefði mátt lífi leikkonunnar Natasha Richardson með því að koma henni strax undir læknishendur. Sjúkrabíl sem kallaður var á vettvang eftir að hún hlaut banvænt höfuðhögg á skíðum var snúið við.

Tíðindin af andláti Richardson eru reiðarslag fyrir samfélag leikara vestanhafs og voru ljósin í leikhúsum Broadway deyfð í virðingarskyni við hana. 

Richardson afþakkaði læknishjálp en þekkt er að þegar einstaklingar fái höfuðhögg með þessum afleiðingum séu þeir fyrst vankaðir og síðan í hálfgerðu óráði áður en banvænn þrýstingur höfuðblæðingar á heila veldur dauða.

Klukkustund eftir slysið kvartaði Richardson undir verkjum og var hún þá í skyndi flutt á sjúkrahús.

Það var hins vegar um seinan.

Eiginmaður Richardson, leikarinn Liam Neeson, fylgdi henni í einkaflugvél til New York þar sem slökkt var á öndunarvél hennar.

Var hún þá í raun þegar látin því að blæðing af þessum toga veldur heiladauða.

Fjölskylda Richardson hefur þakkað fyrir þann stuðning sem henni hefur verið sýndur en fjölmargir hafa vottað fjölskyldunni samúð sína.

• 3 blogg um fréttina

Bloggað um fréttina

• Erla Einarsdóttir: Hvernig á að þekkja heilablæðingu?
• Ívar Pálsson: Varlega með höfuðið
• Stefán Friðrik Stefánsson: Sorgarsaga Natöshu