Emilíana Torrini situr nú í 36. sæti evrópska Billboardlistans með hið svaðalega grípandi „Jungle Drum“ sem er tekið af plötu hennar, Me and Armini, sem út kom síðasta haust.
Lagið er nýtt á lista, fór semsagt beint í þetta sæti en listinn inniheldur hundrað lög. Hann heitir fullu nafni European Hot 100 Singles og er upplýsingum safnað frá fimmtán Evrópulöndum.
Lagið er gefið út af Rough Trade í Bretlandi og kom upprunalega út í mars. Lagið er eingöngu gefið út sem niðurhal, eins og síðasta smáskífa, „Big Jumps“. Eingöngu fyrsta smáskífan, titillagið sjálft, hefur komið út í efnislegu formi (sem sjötomma). Laginu góða hefur semsagt verið otað aftur að fjölmiðlungum, enda siglir Torrini af stað í mikla tónleikareisu nú um helgina.
Það verður að vonum spennandi að fylgjast með gengi lagsins á næstu vikum en Torrini náði að skjóta nokkrum málsmetandi listamönnum ref fyrir rass þessa vikuna, þ.ám. söngkonunni Little Boots sem var spáð mikilli frægð og frama í upphafi þessa árs af BBC, var þá efsti kandidatinn í spá um hverjir myndu meika það í ár.
Listann má sjá í allri sinni dýrð á billboard.com. Við lögin eru hengd ýmis veftæki og tól, hlekkir á hlustun, hringitóna, vefverslanir o.s.frv. Lag Emilíönu er þó hið eina sem hefur myndbandshlekk og kannski að þessi glúrni markaðsöngull Rough Trade-manna nái að fleyta Torrini upp listann en toppsætið þessa vikuna vermir önnur söngkona, Lady GaGa.