Rykið hefur verið dustað af gömlu lagi með Rolling Stones, sem verður gefið út í takmörkuðu upplagi sem sjö tommu smáskífa á morgun þegar haldið verður upp á Record Store Day, sem er alþjóðlegur dagur óháðra plötuverslana.
Lagið fannst nýverið en það var tekið upp þegar Stones voru að vinna að meistaraverkinu Exile On Main Street, sem kom út árið 1972. Það hefur hins vegar beðið síns tíma í læstri hvelfingu.
Félagarnir í Rolling Stones fundu lagið þegar þeir voru að vinna að endurútgáfu plötunnar, sem verður gefin aftur út 18. maí nk.
Aðeins hafa verið gerð 1.000 eintök sérstaklega fyrir Plötubúðardaginn, sem er nú haldinn í fjórða sinn.
Hljómsveitir á borð við Bítlana, Pet Shop Boys og Goldfrapp munu einnig senda frá sér lög í takmörkuðu upplagi.