Táningsstjarnan Rebecca Black hefur síður en svo lagt hljóðnemann á hilluna. Hún hefur hafið gerð plötu og mun brátt gefa út annað lag, sem mun bera heitið LOL.
Hin þrettán ára gamla Black skaust á stjörnuhimininn á dögunum fyrir lag sitt, Friday. Lagið hefur notið gríðarlegra vinsælda og hefur myndbandinu til dæmis verið hlaðið niður tæplega 53 milljón sinnum á vefsíðunni Youtube.com.
Black hefur þó ekki enn fengið plötusamning, þótt margir hafi lýst yfir áhuga á stjörnunni. Hún vinnur að nýja laginu í Flying Pig Productions hljóðverinu í Los Angeles.
Söngkonan hefur hlotið nokkra gagnrýni, meðal annars fyrir tilþrifalitla textagerð í Friday. Hún lætur hana ekki á sig fá.
„Ég er ánægð með að syngja eins og þrettán ára stúlka sem reynir ekki að vera eitthvað annað en hún er,“ sagði Black í viðtali. „Fólk sagði að ég væri hin versta söngkona og lagið væri hið versta. Það gagnrýndi röddina mína og textann. En ég kalla slíkt fólk neikvæðar Nönnur (e. negative Nancies). Það getur reynt að spilla minni gleði en það er í raun bara að spilla eigin gleði.“