Tónlistarmaðurinn Jamie Cullum prýðir forsíðu nýjasta tölublaðs Monitor, en hann heldur tónleika á Íslandi í júní. Cullum hafði gaman af ummælum landa síns Ed Westwick sem leikur í Gossip Girl, en eins og frægt er orðið sagði Westwick að það hafi verið eins og Bítlaæði þegar hann kom til landsins.
„Aðdáendur mínir eru kannski ekki beinlínis týpurnar sem fara að öskra á eftir mér. Hann er hins vegar að leika í Gossip Girl, þannig að líklega var fullyrðingin um Bítlaæðið rétt hjá honum,“ segir Cullum.
Cullum er söluhæsti djasslistamaður allra tíma í Bretlandi. Hann hefur verið tilnefndur til fjölda verðlauna, þar á meðal Golden Globe fyrir að semja tónlistina í kvikmyndinni Gran Torino. Hann er þekktur fyrir frábæra sviðsframkomu og á tónleikum er ekki óalgengt að sjá hann taka upp á hlutum á borð við að bítboxa, halda appelsínum á lofti og stökkva af píanóinu. Hægt er að nálgast miða á tónleikana hér.
Vegna páskafrísins kemur Monitor að þessu sinni út á miðvikudegi og verður dreift með fríblaðinu Finni á öll heimili landsins.