Rússneski óperusöngvarinn Jevgení Nikitín tilkynnti í dag að hann hefði hætt við að taka að sér aðalhlutverkið í uppfærslu Bayreuth-tónlistarhátíðarinnar á Wagner-óperunni Hollendingnum fljúgandi.
Nikitín ákvað þetta í kjölfar þess að þátturinn „Aspekte“ á þýsku sjónvarpsstöðinni ZDF ákvað að fjalla sérstaklega um húðflúrið á bringu hans, en þar má m.a. finna hakakross. Nikitín sagði að hann hefði ekki áttað sig á því hversu mikil særindi slík tákn gætu valdið. „Ég lét gera þetta þegar ég var ungur“ sagði Nikitín, en hann var einu sinni í rokkhljómsveit. „Þetta voru ein af stærstu mistökunum sem ég hef gert á ævinni, og ég óska þess að ég hefði aldrei gert þetta.“
Tónlistarhátíðin í Bayreuth er tileinkuð verkum þýska tónskáldsins Richard Wagner og dregur að sér fjölda aðdáenda á hverju ári. Hún hefur þó á stundum þurft að glíma við skugga fortíðarinnar, en Adolf Hitler var mikill aðdáandi Wagners og mætti oft á hátíðina á sínum tíma.
Ákvörðun Nikitíns, sem er bassa-barítón, þýðir að stjórn hátíðarinnar hefur einungis þrjá daga til þess að finna nýjan aðalsöngvara í hlutverk skipstjórans á Hollendingnum fljúgandi, sem neyðist til að sigla um heimshöfin sjö þar til hann finnur ástina. Verkið var fyrsta alvöru ópera Wagners.