Mál kynfærakokks til saksóknara

Mál rúmlega tvítugs karlmanns í Japan sem játaði í vor að hafa eldað eigin kynfæri og selt þau sem máltíðir er komið til embættis saksóknara.

Er það í höndum saksóknara í Tókýó að gefa út ákæru á hendur manninum og þremur öðrum sem hafa játað að hafa aðstoðað hann við gjörninginn. Mannát er ekki bannað með lögum í Japan.

Maðurinn, Mao Sugiyama, er 23 ára og kynnir sig sem kynlausan listamann. Í tölvupósti sem hann sendi AFP-fréttastofunni í maí staðfesti hann að viðburðinn hefði átt sér stað og ástæðan fyrir gjörningnum væri að minna á stöðu kynferðislegra minnihlutahópa og kynlausra. Kynfæri mannsins voru borin á borð fyrir 71 gest í tónlistarklúbbi hinn 13. maí sl.

Fjórmenningarnir sem stóðu að gjörningnum hafa allir staðfest hlut sinn í málinu og eiga yfir höfði sér allt að tveggja ára fangelsi og/eða fjársektir.

Í tísti listamannsins frá 18. maí sl. kemur fram að fyllsta öryggis hafi verið gætt og farið hafi verið að lögum, til að mynda lögum sem banna sölu á líffærum, losun úrgangs og meðferð matvæla út frá heilbrigðissjónarmiðum.

Að sögn Sugiyama voru typpi hans og eistu fjarlægð af skurðlækni í mars og tryggt að engar sýkingar væru í kjötinu. Kynfærin voru síðan höfð í frysti í tvo mánuði áður en þau voru borðuð. Hver veislugesta greiddi 20 þúsund jen, rúmar 30 þúsund krónur, fyrir máltíðina.

• 1 blogg um fréttina

Bloggað um fréttina

• Anna Dóra Gunnarsdóttir: Ofurböllur