Beinagrind í skápnum

Byggingaverkamönnum í norðausturhluta borgarinnar Tókíó, höfuðborgar Japan, brá talsvert í brún er þeir opnuðu skáp í yfirgefinni íbúðarbyggingu sem þeir hugðust rífa niður. Í skápnum lá beinagrind af manni, hún hvíldi höfuðið á púða og yfir hana hafði teppi verið breitt nostursamlega.

Lögregla hallast helst að því að viðkomandi hafi farið inn í bygginguna eftir að hún hafði verið yfirgefin og haldið þar til. Ekki er vitað hvort um er að ræða karl eða konu.

Í frétt AFP-fréttastofunnar segir að ekki sé óalgengt í Japan að lík finnst mörgum árum eða áratugum eftir að viðkomandi gaf upp öndina. Fjölskyldubönd, sem áður hafi verið svo sterk í landinu, hafi raknað upp og algengt sé að eldra fólk sé aleitt og yfirgefið síðustu æviár sín.

• Blogga um frétt