Jeremy Clarkson, einn stjórnenda bresku sjónvarpsþáttanna Top Gear, sem sýndir eru á BBC 2, hefur haft lag á að koma sér í klandur. Síðustu daga hefur hann sætt mikilli gagnrýni eftir að hann skrifaði á Twitter-síðu sína að hann væri með bjór í bíl sínum á meðan hann keyrði.
Clarkson, sem var að keyra um Ástralíu síðastliðinn laugardag, tvítaði: „Ein af bestu ökuferðum lífs míns. Malarvegur. M6. Sólin að setjast. iPodinn að spila Blind Faith. Bjór í flöskuhaldaranum.“
Hann var um leið harðlega gagnrýndur fyrir það að hafa frjálsleg viðhorf gagnvart ölvunarakstri. Þetta er ekki í fyrsta skipti sem hann er gagnrýndur fyrir drykkju sína, en árið 2008 voru stjórnendur Top Gear fordæmdir fyrir að hafa drukkið gin og tónik á Norðurpólnum.
Þá þurfti hann, ásamt tökuliði Top Gear, að flýja Argentínu nýlega eftir að innfæddir grýttu hópinn. Clarkson hafði keyrt um landið á Porsche með númeraplötunni H982 FKL, en númeraplatan mun vera vísun í Falklandseyjastríðið árið 1982 en þar biðu Argentínumenn lægri hlut gegn Bretum.
One of the best drives of my life. Gravel road. M6. Sun going down. iPod playing Blind Faith. Beer in cup holder. pic.twitter.com/95Okh9vnPh
— Jeremy Clarkson (@JeremyClarkson) October 25, 2014