Sá orðrómur hefur komist á kreik að leikarinn Robert Pattinson sé blankur. Ástæðan mun vera sú að þau laun sem hann fær þessa dagana jafnast ekki á við þau laun sem hann fékk fyrir Twilight-kvikmyndirnar. Þetta eru því mikil viðbrigði fyrir hann.
Pattinson skaust upp á stjörnuhimininn þegar hann lék vampíruna Edward Cullen í Twilight. Nýverið hefur hann þá leikið í minni hlutverkum sem borga ekki eins vel. „Rob er að eyða jafn miklu núna og hann gerði á þeim tíma sem hann var með himinhá laun,“ sagði heimildamaður OK Magazine.
Peningaleysið mun þá hafa ýtt Pattinson út í fyrirsætustörf en hann prýðir auglýsingar fyrir nýjan herrailm frá Dior Homme. „Hann er ekki týpan til að gerast andlit nýs herrailms, hann er einfaldur náungi og ekki fyrir hátísku,“ útskýrði heimildamaðurinn og sagði Pattinson einfaldlega hafa vantað pening.