„Guð er vitfirringur“

Leikarinn Stephen Fry var ómyrkur í máli þegar þáttastjórnandi írska ríkissjónvarpsins spurði hann hvað hann myndi segja segja ef hann hitti guð eftir dauðann. Sagðist Fry telja guð vera hryllilegan vitfirring og að hann hefði ekki áhuga á að komast inn í himnaríki á forsendum slíks guðs.

„Beinkrabbamein í börnum. Hvað er málið með það? Hvernig dirfist þú? Hvernig dirfist þú að skapa heim þar sem er slík eymd sem er ekki okkur að kenna? Það er ekki réttlátt. Það er algerlega, algerlega illt. Af hverju ætti ég að virða duttlungafullan, meinfýsinn, heimskan guð sem skapar heim sem er svo uppfullur af óréttlæti og þjáningu,“ sagði Fry við spyrilinn sem var sem steinrunninn.

Yrðu guðirnir sem tækju á móti honum við dauðann hins vegar ólympusguðir Grikkja yrði Fry skilningsríkari. Þeir hefðu nefnilega aldrei þóst vera neitt annað en mannlegir eða hafnir yfir langanir sínar og skapgerðarbresti.

„Þeir þóttust ekki vera alsjáandi, alvitrir, algóðir, alörlátir. Guðinn sem skapaði þennan alheim, ef hann var skapaður af guði, er bersýnilega vitfirringur. Alger vitfirringur. Fullkomlega sjálfselskur. Við þurfum að eyða lífinu á hnjánum við að þakka honum fyrir. Hvers konar guð myndi gera það?“ spurði Fry sem er vel þekktur fyrir efahyggju sína.

Með því að hafna tilvist guðs gæti fólk öðlast líf sem væri einfaldara, hreinna og frekar þess virði að lifa, að mati Frys.

• 2 blogg um fréttina

Bloggað um fréttina

• Ragnar Geir Brynjólfsson: Heimurinn er enn í sköpun
• Mofi: Stephen fry um karakter Guðs