Feðgin eru með breiðustu tungur í heimi

Maður að nafni Byron Schlenker komst í heimsmetabók Guinness í nóvember í fyrra fyrir að vera með breiðustu tungu í heimi. Schlenker segir líf sitt hafa gjörbreyst eftir að hann komst í heimsmetabókina fyrir tunguna sem er 8,57 sentimetrar á breidd.

 „Ókunnugt fólk stoppar mig og vill taka mynd,“ sagði Schlenker í viðtali við The Telegraph. „Svo hefur fólk komið heim til mín til að fá heimsmetabókina áritaða. Ein kona bað mig meira að segja að sleikja bókina sína, ég afþakkaði pent,“ útskýrði Schlenker. Hann sagði að margt fólk væri undrandi á því að hann gæti talað eðlilega.

Eiginkona Schlenkers er stolt af manni sínum en hún segir kunningja sína gjarnan grínast með ástarlíf þeirra þegar tungan berst í tal. Þá kýs hún að tjá sig sem minnst. „Við reynum bara að hlæja að þessu.“

Emily, 14 ára dóttir Schlenkers, er sú sem mældi tungu föður síns og hringdi í heimsmetabók Guinnes. Sjálf er Emily með stóra tungu en hennar tunga er 7,33 sentimetrar á breidd, það mun vera breiðasta tunga sem mælst hefur á kvenmanni af teymi heimsmetabókar Guinnes.

• Blogga um frétt