Hin 90 ára Pauline McKee hafði unnið 2 dollara í spilakassaleiknum Miss Kitty þegar skilaboð birtust á skjánum þess efnis að hún hefði jafnframt unnið bónusvinning að upphæð 41,8 milljónir dollara. McKee sá fyrir sér að geta styrkt barnabörnin þrettán fjárhagslega, en dómstólar í Iowa gerðu út um þann draum.
Þegar McKee hugðist innheimta vinninginn neitaði spilavítið sem átti vélina að greiða hann út og sagði að um tölvumistök væri að ræða. Hófst þá málarekstur og rannsókn á umræddum spilakassa, en framleiðandi vélarinnar sagði að villan væri þekkt og að spilavítum hefði verið gert viðvart. Umrætt spilavíti hafði hins vegar ekki gripið til ráðstafana.
Lögmenn McKee drógu í efa að um bilun hefði verið að ræða, en allt kom fyrir ekki. Máli ömmunnar gegn spilavítinu var að lokum vísað frá í hæstarétti Iowa.
Þetta mun ekki vera í fyrsta sinn sem mál af þessum toga kemur upp í Bandaríkjunum en árið 2009 fékk annar spilari upp skjáskilaboð um milljón dollara bónusvinning, sem dómstóll í Mississippi dæmdi ógild.