Leikarinn Brad Pitt mætti krambúleraður í andlitinu á góðgerðatónleika í Hollywood á laugardaginn. Pitt datt á aðfaranótt laugardags á heimili sínu þegar sandalarnir hans flæktust fyrir honum.
Talsmaður Pitt greindi frá þessu. „Þetta er það sem gerist þegar þú hleypur upp tröppur með fangið fullt, klæddur í sandala,“ sagði hann meðal annars.
Það stórsá á Pitt en hann lét það ekki stoppa sig í að láta gott af sér leiða. Pitt tók þátt í uppboði kvöldsins en þar voru hljóðfæri og aðrir hlutir til sölu og allur ágóðinn rann til góðgerðasamtakana Autism Speaks. Pitt bauð hæsta boð í einstakan gítar og greiddi 3,1 milljón fyrir gripinn.