Madonna smellti rennblautum kossi á Drake í atriði þeirra á Coachella-hátíðinni í apríl og viðbrögð Drakes vöktu mikla athygli vegna þess að hann virtist hrylla við kossinum. En Madonna hefur nú loksins tjáð sig um kossinn, hún segir Drake hafa grátbeðið um hann.
Madonna svaraði spurningum um kossinn á Saturday Night Online um helgina. Þar viðurkenndi söngkonan að hún sæi eftir að hafa kysst rapparann.
„Ég kyssti stelpu og mér líkaði það,“ sagði Madonna kaldhæðnislega aðspurð hvort Drake væri góður í að kyssa.
Þegar Madonna var svo beðin að gefa ungri sjálfri sér ráð þá sagði hún: „Ekki kyssa Drake. Alveg sama hversu oft hann grátbiður þig.“
Drake greindi frá því eftir Coachella-hátíðina að hann hefði notið þess að kyssa Madonnu en hann hefði hryllt við varaglossinu sem hún var með.