Leikarinn Matthew Lewis, sem fór með hlutverk Neville Longbottom í Harry Potter-myndunum, hefur aldeilis breyst mikið síðan fyrsta myndin um galdrastrákinn Potter kom út árið 2001. Lewis fækkaði nýverið fötum fyrir nýjasta tölublað Attitude og ljósmyndirnar af honum hafa vakið mikla athygli.
Hinn 25 ára Lewis er í flottu formi og er ófeiminn við að sýna það. Hann prýðir forsíðu júní-tölublaðs Attitude og inni í blaðinu má svo finna viðtal við leikarann ásamt myndaþætti.
Lewis þykir fjallmyndarlegur en hann er hissa á allri athyglinni sem hann er að fá. „Ég bjóst ekki við þessu. Ég hef aldrei talið sjálfan mig vera myndarlegan, bara í meðallagi,“ sagði hinn hógværi Lewis.