Söngkonan Lily Allen féll í yfirlið á tónlistarhátíðinni Glastonbury vegna glæfralegs lífernis. Allen, sem er árlegur gestur á hátíðinni, þurfti aðstoð sjúkraliða eftir að hún féll í yfirlið baksviðs laugardagskvöldið 27. júní.
Á vef Contactmusic.com kemur fram að Lily hafi verið með eiginmanni sínum Sam Cooper og nokkrum vinum á VIP-svæði hátíðarinnar þegar það leið yfir hana. Vitni segja að söngkonan hafi legið í um 45 mínútur og þurft að jafna sig. Sjúkraliðar gáfu henni súrefni en töldu að hún þyrfti ekki á meiri aðstoð að halda eftir það.
Hún hefur þó náð skjótum bata þar sem hún var mætt á Wireless-hátíðina í London síðastliðna helgi. „Það er allt í góðu með hana og hún skemmti sér frábærlega á Glastonbury,“ sagði heimildarmaður tímaritsins The Sun.