Uppselt er á tónleika söngkonunnar Jessie J sem fram fara í Laugardalshöll 15. september. Þetta staðfestir Guðbjartur Finnbjörnsson, sem stendur fyrir tónleikunum, við mbl.is.
„Það er uppselt, seldist upp á rúmum sólarhring og það verða ekki aukatónleikar,“ segir Guðbjartur við mbl.is. Hann hélt þó eftir nokkrum miðum þannig að fólk þarf ekki að örvænta, það á ennþá möguleika á að næla sér í miða.
„Það eru 50-100 miðar eftir sem fara örugglega í sölu í næstu viku.“ Guðbjartur segir að fólk geti haft samband við midi.is til að koma sér á biðlista vegna miðanna. „Ég veit að þessir miðar sem eru eftir fara einn tveir og bingó.“
Ekki fengust nánari skýringar á því hvers vegna miðunum var haldið eftir né biðlistafyrirkomulaginu.
Ekki náðist í midi.is við vinnslu fréttarinnar.