Skiptastjóri dánarbús Bobbi Kristinu Brown, dóttur söngkonunnar Whitney Houston, höfðaði mál í gær föstudag gegn fyrrverandi kærasta hennar, Nick Gordon, fyrir að gefa henni „eitraðan kokteil“ og dýfa höfði hennar ofan í baðkar. Brown fannst án meðvitundar í baðkari á heimili sínu í janúar. Hún komst aldrei til meðvitundar og lést fyrr í sumar.
Fram kemur í frétt AFP að málið hafi upphaflega verið höfðað 24. júní. Breytt útgáfa hafi verið lögð fram í gær. Gordon er sakaður um andlegt og líkamlegt ofbeldi í garð Brown og fyrir að hafa stolið rúmlega 11 þúsund dollurum frá henni í kjölfar þess að hún missti meðvitund.
Þá er hann sakaður um að bera ábyrgð á dauða hennar. Byggt er á rifrildi á milli Gordons og Brown sem er sagt hafa átt sér stað skömmu áður en hún fannst í baðkarinu. Rifrildið hafi staðið í um hálftíma eftir að Gordon kom heim eftir að hafa verið úti á lífinu þar sem hann hafi neytt kókaíns og áfengis.
Samkvæmt málshöfðuninni gaf Gordon Brown „eitraðan kokteil“ sem varð til þess að hún missti meðvitund. Í kjölfarið hafi hann dýft höfði hennar ofan í baðkarið sem fyllt hafði verið af köldu vatni sem hafi valdið henni heilaskemmdum. Fullyrt er að Brown hafi að lokum látist af þessum sökum.